Azərbaycanda ilk dəniz milli parkı yaradılacaq

Azərbaycanda ilk dəniz milli parkının yaradılması istiqamətində işlərə başlanılıb, ərazinin xəritələşdirilməsi yekunlaşıb. Bu barədə Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin rəis müavini Rəşad Allahverdiyev bildirib.

Onun sözlərinə görə, layihə çərçivəsində Abşeron Milli Parkının ərazisinə dəniz akvatoriyasının da daxil edilməsi nəzərdə tutulur. Ərazidə qanunsuz balıq ovunun qarşısının alınması və mühafizənin gücləndirilməsi üçün reydlər keçiriləcək.

Allahverdiyev qeyd edib ki, xüsusi mühafizə olunan təbiət ərazilərində qoruma tədbirləri ilboyu aparılır, balıqların kürüləmə dövründə isə sutkalıq növbətçilik rejiminə keçilir.