Media və Yayım Şurası: Hanning işi ilə bağlı Azərbaycan adı hallandırılmayıb

Azərbaycan Media və Yayım Şurası Almaniyanın Federal Kəşfiyyat Xidmətinin (BND) keçmiş rəhbəri August Hanninglə bağlı istintaqla əlaqədar Azərbaycanın adının hallandırıldığı məlumatları təkzib edib və onları dezinformasiya kimi qiymətləndirib.

Şuranın bəyanatında bildirilir ki, “Der Spiegel” nəşrinin yaydığı, daha sonra Reuters, AFP, France 24, The Times və The Telegraph kimi beynəlxalq media resurslarında yer alan məlumatlarda Azərbaycanın sözügedən istintaq işi ilə əlaqələndirilməsi əsassızdır.

Reuters-in məlumatına görə, Hanning oktyabrın 6-da dövlət sirrinin əldə edilməsi, casusluq və dövlətə xəyanətə cəhd şübhələri ilə saxlanılıb. Almaniya prokurorluğu onun keçmiş BND əməkdaşından məxfi sənədlər əldə edərək xarici kəşfiyyat xidməti üçün təhlil hazırladığından şübhələnir. Prokurorluq həmin xarici xidmətin hansı ölkəyə aid olduğunu açıqlamayıb.

“Der Spiegel” isə istintaqın Hanningin Azərbaycan kəşfiyyatının əməkdaşı ilə əlaqəsinin olub-olmadığını araşdırdığını yazıb. Məlumata görə, sözügedən təhlilin nəzərdə tutulan ünvana çatıb-çatmadığı hələ müəyyən edilməyib.

Media və Yayım Şurası beynəlxalq media qurumlarını məlumatları dərc etməzdən əvvəl yoxlamağa, etibarlı mənbələrə istinad etməyə və dəqiqlik və obyektivlik prinsiplərinə riayət etməyə çağırıb.

Şura Azərbaycanın adının bu istintaqla əlaqələndirilməsini Azərbaycan-Almaniya münasibətlərinə zərər vurmağa yönəlmiş kampaniyanın tərkib hissəsi kimi qiymətləndirib.

August Hanning 1998-2005-ci illərdə Almaniyanın xarici kəşfiyyat xidməti olan BND-yə rəhbərlik edib. Almaniya prokurorluğunun məlumatına görə, onun keçmiş BND əməkdaşı Manfred D. ilə birlikdə məxfi məlumatların əldə edilməsi və istifadəsi ilə bağlı fəaliyyəti araşdırılır. Manfred D. də saxlanılıb.

Gülnar Nazimqızı