Regionlarda problemləri çəkən jurnalistlər təzyiqlə üzləşir -deputat

Milli Məclisin deputatı Naqif Həmzəyev regionlarda sosial və infrastruktur problemlərini işıqlandıran jurnalistlərin təzyiqlərə məruz qaldığını bildirir.

O, bəzi hallarda həmin məlumatları yayımlayan jurnalistlərin işdən çıxarıldığını və ya təqib olunduğunu bildirib.

Deputat parlamentdə çıxışı zamanı qeyd edib ki, regionlarda bəzi yaşayış binalarının təmir olunmaması, yolların yararsız vəziyyətdə qalması kimi problemlər mediada işıqlandırılarkən maneələrlə üzləşir.

“Bəzi evlər var ki, medianı da ümumiyyətlə çəkməyə, işıqlandırmağa qoymurlar. Hansı media o məlumatı işıqlandırırsa, həmin jurnalist ümumiyyətlə bəlkə də işdən çıxarılır və yaxud müəyyən təqiblərə məruz qalır. Bu, yaxşı hal deyil. Problemi gizlətməklə, onu növbəti illərə ötürməklə biz heç nə əldə etmirik”, - Həmzəyev bildirib.

Deputat hökumət nümayəndələrinin regionlara səfərləri zamanı yerli icra hakimiyyəti orqanlarının əvvəlcədən müəyyən etdiyi marşrutdan kənara çıxaraq sakinlərlə görüşməsini təklif edib. Onun sözlərinə görə, bu halda hökumət üzvləri yerlərdəki problemləri birbaşa görə bilərlər.

Həmzəyev çıxışında məktəblərdəki bufetlərdə təqdim olunan qidaların keyfiyyətinin araşdırılmasının və ibtidai sinif şagirdlərinin gündə bir dəfə isti yeməklə təmin edilməsinin mümkünlüyünün nəzərdən keçirilməsini də təklif edib.

O, həmçinin regionlarda, xüsusilə 1960-1980-ci illərdə tikilmiş yaşayış binalarının təmirindəki problemlərə diqqət çəkib. Deputat bildirib ki, bəzi binalarda yalnız dam örtüyü təmir edilir, girişlər, liftlər və pilləkənlər isə yararsız vəziyyətdə qalır.

Deputat Gəncədə kanalizasiya layihəsi ilə əlaqədar asfaltlanmayan yollar məsələsini də qaldırıb. Onun sözlərinə görə, 2011-ci ildən sakinlərə kanalizasiya işləri başa çatdıqdan sonra yolların asfaltlanacağı bildirilsə də, 2026-cı ilin sonuna yaxın hələ də asfalt örtüyü olmayan küçələr var.