Qırğızıstan Prezidentinin Azərbaycana səfərindən gözləntilər -ŞƏRH

18.04.2022 14:44

Qırğız Respublikasının Prezidenti Sadır Japarovun aprelin 19-da Azərbaycana səfəri gözlənilir. Bu barədə Qırğız Respublikası Prezident Administrasiyasının xarici siyasət şöbəsinin müdiri Jeenbek Kulubayev məlumat verib.

Səfər aprelin 19-dan 20-dək davam edəcək.

Səfər çərçivəsində Azərbaycan və Qırğız Respublikasının liderləri ikitərəfli və çoxtərəfli əməkdaşlığın aktual məsələlərini, həmçinin səmərəli əməkdaşlığın gələcək inkişafı və qurulması perspektivlərini müzakirə etməyii planlaşdırır.

İqtisadçı ekspert Akif Nəsirli bildirir ki, Azərbaycan və Qırğızıstan arasında ciddi iqtisadi əlaqələr yoxdur, amma Rusiyaya sanksiya tətbiq olunan dövrdə Qırğız Respublikası ilə əlaqələr daha da yaxınlaşa bilər.

"Qırğızıstanda elektroenergetika, yüngül, yeyinti sənayeləri, o cümlədən əlvan metallurgiya və maşınqayırma sənayesi ixtisaslaşmış sahələrdir. Bu baxımdan sabahkı səfərdə hər iki ölkə üçün perspektivli iqtisadi sazişlər imzalana bilər. Xüsusilə də, bu görüş Rusiyaya sanksiyaların tətbiq olunduğu dövrə təsadüf edir. Qərb, Orta Asiya dövlətləri ilə Rusiya üzərindən deyil digər istiqamətlərdə logistik əlaqələr axtarır. Gələcəkdə Çindən Avropa gedən yol Qırğızıstan, Özbəkistan, Qazaxıstandan keçə bilər. Bu dəhliz barədə müzakirələr aparıla, həmin istiqamətdə sazişlər imzalana bilər", - ekspert bildirdi.

Siyasi analitik, "Atlas" Araşdırmalar Mərkəzinin rəhbəri Elxan Şahinoğlunun sözlərinə görə, Qırğızıstan kasıb ölkədir, Azərbaycanın investisiyalarına ehtiyac duyur.

"Düşünürəm ki, iqtisadi mövzular müzakirə ediləcək. Lakin siyasi mövzular da gündəmdə ola bilər. Qırğızıstan prezidentləri Ermənistana tez-tez səfərlər edir, əlaqələr qururdu. Bu siyasətdən rəsmi Bakı narazı idi. Bu narazılığını da açıq-aydın etiraf edirdi. İndi belə səfərlər bu siyasəti dəyişməyə imkan yaradır", - o bildirib.

Siyasi şərhçi Rusif Məmmədsoy vurğulayır ki, Kollektiv Təhlükəsizlik Müqaviləsi Təşkilatının (KTMT) üzvü olan Qırğızıstan ilə münasibətlər səfərdən sonra daha da yaxşılaşacaq.

"KTMT-nin real güc olaraq heç bir perspektivi yoxdur. Ora üzv olsa belə Qırğızıstan Respublikası Azərbaycan ilə yaxınlaşmağa üstünlük verir. Səfərdə iqtisadi əlaqələrin güclənməsi, siyasi yaxınlığın artması fonunda danışıqların aparılması proqnozlaşdırılır", - Məmmədsoy söyləyib.

Səfər Qırğızıstan və Azərbaycan arasında diplomatik münasibətlərin qurulmasının 30 illiyi, eləcə də ölkələr arasında Dostluq və Əməkdaşlıq Müqaviləsi imzalanmasının 25 illiyi ərəfəsinə təsadüf edir.

Hazırda Qırğızıstanda 20 minə qədər azərbaycanlı yaşayır. İki ölkə arasında diplomatik əlaqələr 1993-cü il yanvarın 19-da qurulub.

Ləman Qasımova

www.anews.az