Milli Məclisin işçi qrupu Türkiyədə Azərbaycana qarşı səsləndirilən ittihamlara etiraz edib

 Milli Məclisin Azərbaycan-Türkiyə parlamentlərarası əlaqələr üzrə işçi qrupu Türkiyənin bəzi media orqanlarında və sosial şəbəkələrində Azərbaycana qarşı qərəzli informasiya kampaniyasının aparıldığını, eləcə də Türkiyənin bəzi siyasi nümayəndələrinin ölkə ilə bağlı əsassız ittihamlar səsləndirdiyini bəyan edib. Bu barədə Milli Məclisin Mətbuat və ictimaiyyətlə əlaqələr şöbəsindən bildirilib.

İşçi qrupunun bəyanatında qeyd olunub ki, Türkiyənin hakim Ədalət və İnkişaf Partiyasının (AK Parti) bəzi millət vəkillərinin və Türkiyə Prezidenti Administrasiyasının baş müşaviri Oktay Saralın Azərbaycanla bağlı açıqlamaları narahatlıq və təəssüf doğurur.

Bəyanatda vurğulanıb ki, Azərbaycan müstəqil və suveren dövlətdir, daxili və xarici siyasətini milli maraqlarına və Konstitusiyasına uyğun müəyyən edir.

“Ulu Öndər Heydər Əliyevin müəyyən etdiyi "Bir millət, iki dövlət" prinsipi məhz iki müstəqil və suveren dövlətin mövcudluğunu nəzərdə tutur. Bu prinsipin mahiyyətinin təhrif edilməsi, ondan Azərbaycanın daxili işlərinə müdaxilə etmək, kənar siyasi və ideoloji yanaşmaları Azərbaycan cəmiyyətinə diktə etmək üçün əsas kimi istifadə olunması qəbuledilməzdir”, - bəyanatda bildirilib.

İşçi qrupu Azərbaycanın dünyəvi dövlət quruluşunun və dini etiqad azadlığının Konstitusiya ilə təmin olunduğunu xatırladıb. Qeyd edilib ki, ölkənin təhsil siyasəti dünyəvilik, bərabərlik və bütün vətəndaşlar üçün bərabər imkanların yaradılması prinsiplərinə əsaslanır.

Bəyanatda təhsil müəssisələrində tətbiq olunan qaydaların bütün vətəndaşlara eyni şəkildə şamil edildiyi və hər hansı dini mənsubiyyətə qarşı yönəlmədiyi vurğulanıb. Bu məsələlərin dini və ideoloji müstəvidə siyasiləşdirilməsi yolverilməz hesab edilib.

İşçi qrupu Prezident İlham Əliyevə, Azərbaycan xalqına, onun tarixinə və görkəmli şəxsiyyətlərinə qarşı təhqir və böhtan xarakterli ifadələrin işlədilməsinə də etiraz edib.

“Bəyanatda AK Parti iqtidarının bu halların qarşısının alınması istiqamətində addım atmaması, eləcə də Azərbaycanın Türkiyədəki diplomatik nümayəndəlikləri qarşısında təxribatçı aksiyalara və bu istiqamətdə çağırışlara dözümlü münasibət göstərilməsi də suallar doğuran məqamlar kimi qeyd olunub.

İşçi qrupu Azərbaycan-Türkiyə münasibətlərinin xüsusi xarakterinin siyasi məsuliyyət, qarşılıqlı hörmət və bir-birinin daxili işlərinə müdaxilə etməmək prinsiplərinə riayət olunmasını tələb etdiyini bildirib.

Bəyanatda Türkiyənin müvafiq siyasi dairələrinə, o cümlədən parlamentdə təmsil olunan hakim partiyanın nümayəndələrinə Azərbaycanın suverenliyinə və konstitusion quruluşuna hörmət nümayiş etdirmək, ikitərəfli münasibətlərə mənfi təsir göstərə biləcək açıqlamalardan çəkinmək çağırışı edilib.