Dövlət Vergi Xidməti ötən il sahibkarlıq assosiasiyaları ilə 50-yə yaxın görüş keçirib

Ötən il İqtisadiyyat Nazirliyi yanında Dövlət Vergi Xidməti sahibkarlıq assosiasiyaları ilə 50-yə yaxın görüş təşkil edib. Bu barədə Dövlət Vergi Xidmətinin rəis müavini Emil Qarayev bildirib.
Onun sözlərinə görə, görüşlərdə iqtisadiyyatın müxtəlif sahələrində fəaliyyət göstərən sahibkarların mövcud problemləri, qanunvericilik və vergi inzibatçılığı ilə bağlı təklifləri dinlənilib.
Qarayev qeyd edib ki, 2027-ci ildən tətbiqi gözlənilən dəyişikliklərin bir çoxu məhz mikro və kiçik sahibkarların həmin görüşlərdə qaldırdıqları məsələlər əsasında formalaşıb.
O bildirib ki, ötən il Dövlət Vergi Xidmətinin nümayəndələri qurumun birbaşa təşkil etdiyi görüşlərlə yanaşı, digər platformalar vasitəsilə keçirilən 20-dən artıq görüşdə də iştirak ediblər.
Rəis müavini əlavə edib ki, Dövlət Vergi Xidməti sahibkarlıq assosiasiyaları ilə yanaşı, maliyyə institutları ilə də əməkdaşlığı davam etdirəcək. Bu əməkdaşlıq maliyyə institutlarının müştərisi olan sahibkarlıq subyektləri üçün əməliyyat və vergi inzibatçılığı sahəsində əlavə imkanlar yaradır.
O, bizneslə dialoqun növbəti illərdə də davam etdiriləcəyini vurğulayıb.

























