Taleh Kazımov: Bank sektorunda kredit portfeli 10 ayda 14 faiz artıb

2026-cı ilin yanvar-oktyabr aylarında Azərbaycanda bank sektorunun ümumi kredit portfeli 14 faiz, biznes kreditləri isə 17,1 faiz artıb. Bunu Mərkəzi Bankın sədri Taleh Kazımov bildirib.
Onun sözlərinə görə, 2021-ci ilin sonu ilə müqayisədə həm ümumi kredit portfeli, həm də biznes kreditlərinin həcmi iki dəfə artıb.
Kazımov qeyd edib ki, hesabat dövründə bank sektorunda dayanıqlılıq göstəriciləri də qənaətbəxş olub. Belə ki, məcmu kapital adekvatlığı 16,5 faiz, likvidliyin örtülməsi əmsalı 153 faiz təşkil edib. Bu əmsal üzrə normativ göstərici 100 faizdir.
“Likvidlik örtülməsi əmsalı 153 faiz səviyyəsində qərarlaşmışdır (norma 100 faiz olduğu şəraitdə). Kredit portfelinin keyfiyyəti isə 2,7 faiz səviyyəsində olmuşdur. Bu da kifayət qədər qənaətbəxş nəticədir”, – Mərkəzi Bankın sədri bildirib.
O əlavə edib ki, fiziki şəxslərin əmanətləri 10 ayda 14,6 faiz, müddətli əmanətlər isə 16,4 faiz artıb.
Kazımovun sözlərinə görə, 2021-ci illə müqayisədə fiziki şəxslərin əmanətlərinin həcmi və unikal əmanətçilərin sayı iki dəfə yüksəlib.

























