Xəzər sahilində 3 200-dən çox tikilidə qanunvericiliyə uyğunsuzluq aşkarlanıb

Azərbaycanın Xəzər dənizi sahilində aparılan monitorinq zamanı torpaq və ya tikinti qanunvericiliyinin tələblərinə uyğun olmayan 3 200-dən çox tikili müəyyən edilib. Bu tikililər təxminən 60 hektar ərazini əhatə edir.
Bunu İqtisadiyyat Nazirliyi yanında Əmlak Məsələləri Dövlət Xidmətinin Torpaqların dövlət idarəetməsinin təşkili və geodeziya şöbəsinin müdiri vəzifəsini icra edən İlqar Həbiyev sahilboyu ərazilərin idarə olunmasına dair təqdimatında bildirib.
Həbiyev vurğulayıb ki, hüquqi statusları tam aydınlaşdırılmadan həmin tikililərin hamısını birmənalı olaraq qanunsuz adlandırmaq düzgün deyil. Onun sözlərinə görə, aşkarlanan uyğunsuzluqlar torpaqdan istifadə və ya tikinti tələbləri ilə bağlıdır.
Dövlət qurumlarının nümayəndələrindən ibarət işçi qrupun səkkiz-on ay ərzində apardığı monitorinq sahil xəttinin 753 kilometrlik hissəsini əhatə edib. Həbiyevin təqdim etdiyi təxmini göstəricilərə əsasən, ümumilikdə 20,4 min hektar ərazi araşdırılıb.
Monitorinq zamanı təmizlənməmiş çirkab sularının dənizə axıdılması, sutəmizləyici qurğuların tam işlək vəziyyətdə olmaması, məişət, tikinti və təhlükəli tullantıların qanunsuz atılması halları da aşkarlanıb.
Həbiyevin sözlərinə görə, sahilboyu ərazilərin idarə olunmasına dair prezident fərmanı çərçivəsində ərazilərin zonalaşdırılması, vahid rəqəmsal məlumat bazasının və elektron kadastr xəritələrinə əsaslanan idarəetmə sisteminin yaradılması nəzərdə tutulur. Müraciət və hesabatların “bir pəncərə” prinsipi ilə vahid sistem üzərindən təqdim edilməsi planlaşdırılır.
Zonalaşdırma zamanı ətraf mühitin mühafizəsi, turizm, istirahət və təsərrüfat fəaliyyəti üçün uyğun sahələr müəyyənləşdiriləcək.
“Burada dövlət mülkiyyəti birmənalı qalacaq. Heç bir sahədə özəlləşdirmə nəzərdə tutulmur”, — Həbiyev icarəyə veriləcək torpaq sahələri barədə bildirib.
O əlavə edib ki, aidiyyəti dövlət qurumları ilə birlikdə pozuntulara görə məsuliyyət tədbirlərinin gücləndirilməsi təklif olunacaq. Məqsəd sahilboyu ərazilərin qorunması ilə yanaşı, vətəndaşların istirahət imkanlarının və biznes üçün xidmətlərin yaxşılaşdırılmasıdır.

























