Hindistanın Azərbaycandakı Səfirliyi “Gandhi Jayanti” və Beynəlxalq Qeyri-Zorakılıq Gününü qeyd edib

Hindistanın Azərbaycandakı Səfirliyi bu gün Bakıda yerləşən Səfirlikdə Mahatma Qandinin doğum günü və Beynəlxalq Qeyri-Zorakılıq Gününün qeyd etmək məqsədilə tədbir təşkil edib.

Tədbirdə Hindistan diasporu assosiasiyalarının rəhbər şəxsləri, Azərbaycandakı Hindistan icmasının üzvləri və Hindistan dostları iştirak ediblər.

Hindistanın Azərbaycandakı səfiri Zati-aliləri cənab Abhay Kumar iştirakçıların adından Mahatma Qandinin xatirəsinə gül dəstələri qoyaraq onun həqiqət, sülh və zorakılıqdan imtina ilə bağlı əbədi mesajlarını yad edib.
Çıxışı zamanı səfir Abhay Kumar Qandinin zorakılıqdan imtinaya sarsılmaz sadiqliyini vurğulayaraq qeyd edib ki, Qandi yalnız zorakılıqdan imtinanı təbliğ etməklə kifayətlənməyib, bütün həyatı boyu bu prinsiplərə əməl edib. O, Qandinin Hindistanın müstəqillik mübarizəsi dövründə belə zorakılığa qarşı çıxmasını, eləcə də Bölünmə zamanı icmalararası zorakılığın qarşısını almaq üçün şəxsi müdaxilələr və aclıq aksiyaları vasitəsilə göstərdiyi səyləri xatırladıb. Səfir həmçinin Qandinin fəlsəfəsinin bütün dünyada liderləri və müxtəlif hərəkatları ruhlandıraraq göstərdiyi qlobal təsiri qeyd edib.

Yaxın Şərqdə, eləcə də Rusiya ilə Ukrayna arasında davam edən münaqişələrə toxunan səfir münaqişələrin həllində dialoq və diplomatiyanın əhəmiyyətini vurğulayıb və Baş nazir Narendra Modinin “bu, müharibə dövrü deyil” mesajını xatırladıb. O qeyd edib ki, Qandinin sülh, tolerantlıq və zorakılıqdan imtina ilə bağlı mesajı müasir dünyada öz aktuallığını qoruyur.

Tədbir çərçivəsində Mahatma Qandinin həyatına və irsinə həsr olunmuş qısametrajlı sənədli film də nümayiş etdirilib. Filmdə onun həyat yolu, fəlsəfəsi, Hindistanın müstəqillik mübarizəsinə verdiyi töhfə və zorakılıqdan imtinanın qlobal ideyasına töhfəsi əks olunub.

Tədbir Hindistanın qlobal sülhə, dialoqa və fikir ayrılıqlarının dinc yolla həllinə sadiqliyini bir daha nümayiş etdirib, eyni zamanda Mahatma Qandinin zorakılıqdan imtina ilə bağlı zamansız fəlsəfəsinin universal əhəmiyyətini bir daha təsdiqləyib.