ABŞ: İsrail və Livan atəşkəs barədə razılığa gəlib

ABŞ Dövlət Departamenti İsrail və Livanın atəşkəs barədə razılığa gəldiyini açıqlayıb. Vaşinqton bildirib ki, razılaşmanın icrası İranın dəstəklədiyi Hizbullah qruplaşmasının atəşi tam dayandırmasından asılıdır.

Dövlət Departamentinin bəyanatında qeyd olunub ki, İsrail və Livan arasındakı münasibətlərin gələcəyi iki suveren dövlət tərəfindən müəyyən edilməlidir. Sənəddə Livanın gələcəyinə təsir göstərməyə çalışan hər hansı dövlət və ya qeyri-dövlət aktorunun cəhdlərinin qəbul edilmədiyi vurğulanıb.

Razılaşmanın şərtlərinə əsasən, Hizbullah döyüş əməliyyatlarını dayandırmalı və döyüşçülərini Livanın cənubunda, İsrail sərhədi ilə Litani çayı arasında yerləşən ərazidən çıxarmalıdır. Razılaşmaya görə, həmin ərazi Litani çayının cənub hissəsi kimi müəyyən edilir.

Atəşkəs bazar ertəsi əldə olunmuş qismən razılaşmadan sonra imzalanıb. Həmin razılaşma çərçivəsində İsrail, Hizbullahın İsrail ərazisinə hücumları dayandırması müqabilində Beyruta zərbələr endirməkdən çəkinməyi öhdəsinə götürmüşdü.

Tərəflərin hərtərəfli razılaşma əldə etmək məqsədilə iyunun 22-də yenidən görüşəcəyi bildirilib. Xəbərin yayımlandığı vaxtadək Hizbullah razılaşma ilə bağlı açıqlama verməyib.

Razılaşma İsrail və Livan nümayəndələrinin Vaşinqtonda iki gün davam edən danışıqlarından sonra əldə olunub.

ABŞ dövlət katibi Marko Rubio jurnalistlərə bildirib ki, Vaşinqton Livanda Hizbullahın iştirak etmədiyi təhlükəsizlik mexanizmlərinin formalaşdırılması üzərində işləməyi planlaşdırır.

İsrail və Hizbullah arasında gərginlik son aylarda sərhəd bölgələrində qarşılıqlı hücumların artması ilə daha da dərinləşib. ABŞ və digər beynəlxalq vasitəçilər döyüşlərin genişmiqyaslı regional münaqişəyə çevrilməsinin qarşısını almaq üçün tərəflər arasında diplomatik səyləri intensivləşdiriblər. Litani çayı bölgəsi uzun illərdir İsrail-Livan təhlükəsizlik müzakirələrinin əsas mövzularından biri hesab olunur.

Gülnar Nazimqızı