DİM 9 illik buraxılış imtahanlarının aprel qrafikini açıqlayıb

Dövlət İmtahan Mərkəzi (DİM) 2026-cı ilin aprel ayının 5-i, 12-si və 26-da ümumi (9 illik) orta təhsil səviyyəsi üzrə keçiriləcək buraxılış imtahanlarının şəhər və rayonlar üzrə qrafikini müəyyənləşdirib. Bu barədə DİM-in yaydığı məlumatda deyilir.

Məlumata görə, imtahanlar ölkənin bütün bölgələrini əhatə edəcək və bəzi iri şəhər və rayonlarda hərəkət intensivliyinin azaldılması məqsədilə iki mərhələdə keçiriləcək. Sözügedən bölgələr Sabunçu, Xəzər, Sumqayıt, Abşeron, Gəncə, Şəmkir, Lənkəran, Cəlilabad, Masallı, Xaçmaz və Quba rayonlarıdır. Qrafikdə bu bölgələr müvafiq olaraq I və II hissə kimi göstərilib.

DİM-in açıqlamasına əsasən, 5 aprel tarixində imtahanlar Bakı şəhərinin Xətai, Nərimanov, Qaradağ, Suraxanı, Səbail və Pirallahı rayonlarında, eləcə də Gəncə (I hissə), Şəki, Lənkəran (I hissə), Astara, Ağdam, Şuşa, Xankəndi, Kəlbəcər, Xocalı və digər rayonlarda keçiriləcək.

12 aprel tarixində buraxılış imtahanları Sabunçu (I hissə), Xəzər (I hissə), Yasamal, Binəqədi, Sumqayıt (I hissə), Abşeron (I hissə), Mingəçevir, Gəncə (II hissə), Qazax, Qəbələ, Oğuz, Lənkəran (II hissə), eləcə də tədrisi ingilis dilində olan məktəblərdə təşkil olunacaq.

26 aprel tarixində isə Sabunçu (II hissə), Xəzər (II hissə), Nəsimi, Nizami, Sumqayıt (II hissə), Abşeron (II hissə), Naxçıvan Muxtar Respublikası, eləcə də qərb, şimal və cənub regionlarını əhatə edən rayonlarda imtahanların keçirilməsi nəzərdə tutulur. Həmin gün Bakı şəhəri üzrə xüsusi məktəblərdə, o cümlədən internat məktəblərində və cəzaçəkmə müəssisələrində yerləşən məktəblərdə, eləcə də gürcü bölməsi üzrə təhsil alan şagirdlər üçün də imtahanlar təşkil ediləcək.

DİM bildirib ki, məcburi köçkün rayonlarının məktəblərində təhsil alan şagirdlər faktiki olaraq bitirdikləri təhsil müəssisəsinin yerləşdiyi şəhər və rayon üzrə müəyyən edilmiş tarixlərdə imtahan verəcəklər.

Mərkəzin məlumatına görə, imtahana buraxılış vərəqələri hər imtahan günündən 5 gün əvvəl DİM-in rəsmi internet səhifəsində yerləşdiriləcək.

Buraxılış imtahanları ümumi orta təhsil səviyyəsini bitirən şagirdlərin biliyinin qiymətləndirilməsi ilə yanaşı, növbəti təhsil pilləsinə keçid baxımından da əsas mərhələlərdən biri hesab olunur.