Dəməşq yaxınlığında avtomobil partladılıb, ölənlər var

Suriyanın paytaxtı Dəməşq yaxınlığında avtomobilə yerləşdirilmiş partlayıcı qurğunun işə salınması nəticəsində 2 nəfər ölüb, 2 nəfər yaralanıb.

Bu barədə Suriyanın "Al-Ikhbaria" telekanalı məlumat yayıb.

Bildirilib ki, hadisə Dəməşq ətrafındakı Cərəmana qəsəbəsində, akkumulyator istehsalı zavodunun yaxınlığında baş verib.

Hadisə yerinə mülki müdafiə qüvvələri cəlb olunub.

Partlayışın səbəbləri və hadisəni törədən şəxslər barədə hələlik məlumat yoxdur.