“Qalibi sındırmaq istəyiblər, pis sözü..." - Ölən tələbənin əmisindən şok sözlər (VİDEO)

"Bir neçə gün öncə Bakı İdarəetmə və Texnologiya Kollecinin tələbələri arasında baş verən davada ölən Qalib Əskərovun istintaq işi davam etdirilir, bu haqda məlumatlar açıqlanmır”. 

 Bunu News24.az-a mərhumun əmisi Əkrəm Əskərov bildirib. "Maraqlısı odur ki, qətl hadisəsi olduğu halda cinayət işi xuliqanlıq maddəsi ilə iş açılıb. Ortada ölüm var, səbəbi ilə bağlı araşdırma aparılır. İstintaqın işinə qarışmaq səlahiyyətim yoxdu. Amma fakt odur ki, bizim uşağımız əldən gedib. Davanın nəyin üstündə olması da istintaqdan sonra deyiləcək”, - Əkrəm Əskərov deyib.

 Onun sözlərinə görə, mərhum Qalib Əskərovun epilepsiya xəstəsi olması xəbəri də yanlışdır: "Qalib sağlam uşaq idi, idmançı idi, 106 kq çəkisi, 196 sm boyu var idi. Onun idealı Mübariz İbrahimov idi. Həmişə deyərdi ki, ana, mən də gedərəm, Mübariz kimi Vətən uğrunda şücaət göstərərəm. Amma uşağımız heç nəyin badına getdi. Kollecin içində mübahisə başlayıb, koridora keçiblər. Təkbaşına müqavimət göstərib, sonda onun başına dəmir alətlə zərbə endirilib. Bu, istintaq tərəfindən araşdırılacaq. Müxtəlif fərziyyələr var, çox guman ki, kəllə-beyin travmasından beyninə qansızma olub. Qalib Rusiya vətəndaşı idi, hələ yetkinlik yaşına çatmamışdı. Polis Akademiyasına hazırlaşırdı, arzuları çox idi...”

 Məhhum tələbənin əmisi onu da qeyd etdi ki, məsələ ilə bağlı mətbuat konfransı keçirməyi də planlaşdırırlar: "Mətbuat konfransı da keçirməyi düşünürük, sadəcə istintaqın gedişinə mane olmamaq üçün hələlik gözləyirik”.  

Ə.Əskərov söhbət əsnasında bildirdi ki, o, iki qardaşını itirib, onlardan biri  şəhid olub: "Mənim bir qardaşım Qalib Əskərov 1994-cü ildə Qarabağda gedən döyüşlərdə şəhid olub. Digər qardaşım da Sovet Ordusunda xidməti borcunu yerinə yetirərkən həlak olub. Qalibə şəhid qardaşımın adını vermişdim. Bir şəhidi iki dəfə necə öldürmək olar?! Onu həmin davada sındırmaq istəmişdilər. Ondan üzr istəmək tələb olunub, ağır şərtlərlə pis sözü boynuna almalarını istəyiblər. O da bunu eləməyib. Tələbələr bunu deməyə qorxurlar. Amma biz bunların hamısını istintaqa bildirmişik”.  


www.anews.az