"Artıq AzTv-yə palatka müğənniləri yol tapa bilməyəcək" - Baba Vəziroğlu

"Bədii Şura yeni bir şey deyil. Sadəcə unudulmuş yaxşı köhnə ənənədir. Onu bərpa etmişik. Sovet dönəmində də televiziyanın tərkibində olub. Sənətkarların məsləhət şurasıdır".

Bu sözləri "Yeni Sabah"a açıqlamasında Əməkdar incəsənət xadimi, şair Baba Vəziroğlu deyib. Onun sözlərinə görə, BŞ senzura, qadağalar mərhələsi deyil:

"Gördüyünüz kimi orada bəstəkar, müğənni, opera müğənnisi, şair, instrumental ifaçı, Mədəniyyət sferası üzrə ali məktəblərin rektorları var. Yəni Azərbaycan Televiziyasının inkişafına , unudulmuş yaxşı ənənələrin bərpasına və müasir prizmadan baxmaq şərtilə AzTv-nin işinin yenidən qurulmasına, verilişlərin bədii səviyyəsinin artırılmasına, bizə yabançı, bəsit, bayağı musiqilərin ora yol tapmaması üçün kömək edəcəyik. Şuraya seçilənlər ad-san naminə dəvət olunmayıblar, hamısı çalışqan insanlardır. Böyük sənətkar olmaqla bərabər, həm də cəmiyyətin fəal üzvləridir".

B. Vəziroğlu bildirib ki, bu gün ilk iclas baş tutub:

"Belə anladım ki, hər iki tərəf, yəni həm rəhbərlik, həm də Bədii Şuranın birgə səyi gözəl nəticələr verəcək. Bu, bizi həm işimizin nəticəsini görən sənətkarlar kimi, həm də televiziya tamaşaçıları kimi sevindirəcək. Məncə, işlər yoluna düşəndən sonra xarici kanallara baxan tamaşaçıların sayı xeyli azalacaq. Bu bizim ən böyük missiyamızdır".

O, həmçinin gənclərə xüsusi önəm veriləcəyini vurğulayıb:

"Yeni proqramlar olacaq. Gənclərə xüsusi önəm veriləcək. Artıq AzTv-yə palatka müğənniləri, onların musiqiləri yol tapa bilməyəcək. Televiziyanın solistlərinin kimlər olacağı məlum olacaq. Hər küçədən keçənlər solist seçilməyəcəklər. Canlı konsert, verilişlər yayımlanacaq. Səs keyfiyyəti çoxunu narahat edirdi, bu problem düzələcək. Dekorasiyalar, təcrübəli rejissorlar, səs operatorları, redaktorlara xüsusi diqqət ediləcək.

Son 20 ildə "Qızıl Fond"a bir əsər də əlavə olunmayıb. Yalnız 30-50 il qabaq yaranmış fonddan istifadə edirik. Bəs o xəzinə bitəndən sonra nədən istifadə edəcəklər? Bu gün ən vacib məsələlərdən biri də "Qızıl Fond"u davamlı şəkildə zənginləşdirməkdir. Ora korifeylərimizin istər lent yazılarını, istərsə də mahnılarına yazılan əsl ekran əsərləri daxil edilməlidir.

Bundan başqa diktorların danışıq, səhnə mədəniyyəti, söz bazası BŞ- nin nəzərində olacaq".