Müxalifət nümayəndəsi olmaq hüquqi məsuliyyətdən azad etmir - Bayramov

Almaniyanın xarici işlər naziri Yohan Vadefulla Bakıda keçirilən birgə mətbuat konfransında Politico jurnalisti Avropa və Almaniya tərəfinin Azərbaycanda qanunun aliliyi ilə bağlı narahatlıqları, xüsusilə müxalifətçi siyasətçi Əli Kərimlinin həbsi və məhkəmə prosesi, həmçinin bunun investisiyalara mümkün təsiri barədə sual verib.
Suala cavab olaraq Azərbaycanın xarici işlər naziri Ceyhun Bayramov bildirib ki, müxalifət nümayəndəsi olmaq insanı hüquqi məsuliyyətdən azad etmir.
“Hər bir şəxs öz etdiyi əməllərə görə qanun qarşısında bərabərdir, qanun qarşısında cavab verməlidir”, — Bayramov deyib.
Nazirin sözlərinə görə, araşdırma Azərbaycan qanunvericiliyinə tam uyğun aparılır və məhkəmənin yekun qərarı yaranan suallara cavab verəcək.
“Bir daha qeyd etmək istəyirəm ki, kiminsə müxalifət nümayəndəsi olması onu hüquqi məsuliyyətdən azad etmir”, — o bildirib və bu prinsipin Almaniyada və digər dövlətlərdə də tətbiq olunduğunu deyib.
Politico jurnalisti Vadefuldan da bu məsələləri danışıqlarda qaldırıb-qaldırmadığını və onların investisiyalara mümkün təsiri barədə xəbərdarlığının qarşı tərəfdən anlaşıldığını düşünüb-düşünmədiyini soruşub.
“Biz bu mövzuları ümumi şəkildə müzakirə etmişik və bizim üçün qanunun aliliyi və insan hüquqları məsələləri həmişə bu mövzulara daxildir”, — Almaniyanın xarici işlər naziri cavab verib.
Vadeful Almaniya və Azərbaycanın Avropa Şurasının üzvü olduğunu və Avropa İnsan Hüquqları Məhkəməsinin yurisdiksiyasına tabe olduğunu xatırladıb.
O, belə məsələlərin müzakirəsində fikir ayrılıqlarının yarandığını bildirib. Bununla yanaşı, hüquq sistemi çərçivəsində qəbul edilən qərarlara hörmətlə yanaşdığını deyib və həmin qərarların Avropa Şurası institutlarının yoxlamasına davam gətirməli olduğunu vurğulayıb.
“Qanunun aliliyi baxımından etibarlılıq təmin olunduqda dünyanın hər yerindən investisiya qoymaq istəyi artır. Mən bu əlaqəyə də diqqət çəkmişəm”, — Vadeful bildirib.
























